སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞབས་པུས་སྨན་བཅོས་ལེགས་གྲུབ་བྱུང་ཡོད་པ་དང་།  ད་ལྟའི་ཆར་རྒྱལ་ས་ལྡི་ལིའི་གཟིམ་ཆུང་དུ་སྐུ་ལྷོད་བཞུགས་མཛད་བཞིན་པ་རེད་འདུག དེ་ཡང་དེ་རིང་ཕྱི་ལོ་ ༢༠༢༦ ཟླ་ ༦ ཚེས་ ༨ ཉིན་རྒྱབ་དགའ་ལྡན་ཕོ་བྲང་ཡིག་ཚང་གིས་དྲྭ་ལམ་བརྒྱུད་བརྙན་ཐུང་གྱི་ལམ་ནས་གསལ་བསྒྲགས་ཤིག་བསྐྱངས་པའི་ནང་།  ༸སྐུའི་བླ་སྨན་པ་ཚེ་བརྟན་རྡོ་རྗེ་ལགས་ཀྱིས།  ༸གོང་ས་༸སྐྱབས་མགོན་ཆེན་པོ་མཆོག་གི་ཞབས་པུས་སྨན་བཅོས་དེ་བཞིན་རྒྱལ་ས་ལྡི་ལིའི་ Apollo སྨང་ཁང་དུ་གནང་ཡོད་པ་དང་།  གཤག་བཅོས་ཆ་ཚང་ལེགས་གྲུབ་བྱུང་ཡོད་པ་མ་ཟད།  ད་ལྟའི་ཆར་རྒྱལ་ས་ལྡི་ལིའི་གཟིམ་ཆུང་དུ་གདན་ཞུས་ཀྱིས་སྐུ་ལྷོད་བཞུགས་མཛད་བཞིན་ཡོད་པ་གསུངས་འདུག རྩ་བའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་སྐྱབས་མགོན་ཆེན་པོ་མཆོག་ཟླ་འདིའི་ཕྱི་ཚེས་ ༥ ཉིན་བཞུགས་སྒར་༸རྒྱལ་བའི་ཕོ་བྲང་ནས་རྒྱལ་ས་ལྡི་ལིར་ཞབས་པུས་སྨན་བཅོས་སླད་ཆིབས་བསྒྱུར་མཛད་ཡོད་པ་དང་འབྲེལ། ཉིན་མོ་དེ་ནས་བཟུང་བོད་མིའི་འདུ་སྡོད་ས་གནས་གང་སར་༸གོང་ས་མཆོག་གི་ཞབས་པུས་སྨན་བཅོས་ལེགས་གྲུབ་ཡོང་ཆེད་༸སྐུའི་ཞབས་རིམ་སྒྲུབ་བཞིན་པ་རེད་འདུག དེ་ཡང་བཞུགས་སྒར་དྷ་རམ་ས་ལར་མཚོན་ན་དེ་རིང་ཕྱི་ཚེས་ ༨ དང་སང་ཚེས་ ༩ བཅས་ཉིན་གྲངས་གཉིས་རིང་ཐེག་ཆེན་ཆོས་གླིང་གཙུག་ལག་ཁང་དུ་སྐུ་བཅར་རྣམ་རྒྱལ་གྲྭ་ཚང་གི་གོ་སྒྲིག་འོག་སེར་སྐྱ་མི་མང་འདུ་འཛོམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་གཟུགས་འཕྲོད་བཞེས་དང་། ཞབས་པུས་སྨན་བཅོས། བསྟན་སྲིད་བདེ་ཐབས་ཀྱི་ཆེད་དུ་སྒྲོལ་མ་འབུམ་ཐེར་དང་། མདོ་སྡེ་བསྐལ་བཟང་དག་སྒྲོག  སྨན་བླའི་མདོ་ཆོག་བཅས་ཀྱི་ཞབས་རིམ་སྒྲུབ་བཞིན་ཡོད་པ་རེད།  འདི་གའི་གསར་འགོད་པས་དེ་རིང་ཞབས་རིམ་གྱི་འདུ་འཛོམས་ཐོག་ཕེབས་པའི་མི་མང་ཁག་གཅིག་ལ་བཀའ་འདྲི་ཞུ་སྐབས།  གཞན་ཡང་༸གོང་ས་མཆོག་གི་ཞབས་པུས་སྨན་བཅོས་ལེགས་གྲུབ་ཡོང་ཆེད་ཁ་ཉིན་ཕྱི་ཚེས་ ༦ ཉིན་སེར་བྱེས་མཁས་སྙན་གྲྭ་ཚང་གི་གཙུག་ལག་ཁང་དུ།  འདུས་དམངས་ཡོངས་ནས་སྨན་བླའི་མདོ་ཆོག་དང་རྟ་མགྲིན་འཕྲིན་བཅོལ་གྱི་ཞབས་རིམ་བསྒྲུབས་ཡོད་པ་དང་།  གདན་ས་བཀྲ་ཤིས་ལྷུན་པོར་སྐྱབས་རྗེ་མཁན་རིན་པོ་ཆེ་མཆོག་དབུ་བཞུགས་ཐོག་འདུས་མང་ནས་གཙུག་ལག་ཁང་དང་ཆོས་རྭའི་ནང་ཁ་སང་ཕྱི་ཚེས་ ༧ དང་དེ་རིང་ཚེས་ ༨ བཅས་ཉིན་གྲངས་གཉིས་རིང་༸རྒྱལ་བའི་སྐུ་ཕྱྭའི་ཞབས་རིམ་བསྒྲུབས་ཡོད་པ།  དེ་བཞིན་འབྲས་སྤུངས་སྒོ་མང་གྲྭ་ཚང་དུ་ཡང་དེ་རིང་༸གོང་ས་མཆོག་གི་ཞབས་སྤུས་སྨན་བཅོས་ལེགས་གྲུབ་ཡོང་ཆེད་དགེ་འདུན་འདུས་མང་ནས་ཞབས་རིམ་བསྒྲུབས་ཡོད་པ་དང་།  རྣམ་གྲོལ་བཤད་སྒྲུབ་དར་རྒྱས་གླིང་དུ་གཅིག་མཚུངས་ཀྱིས་ཟླ་འདིའི་ཕྱི་ཚེས་ ༦ ཉིན་མཁན་སྤྲུལ་བླ་སློབ་དགེ་འདུན་བཙུན་མ་བཅས་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞབས་པུས་སྨན་བཅོས་ལེགས་གྲུབ་ཡོང་ཆེད་དུ་དམིགས་ཏེ་ཞབས་རིམ་གསོག་སྒྲུབ་གནང་ཡོད་པ་རེད།  གཞི་རྩའི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་འདས་པའི་ཕྱི་ལོ་ ༢༠༢༤ ལོའི་ཕྱི་ཟླ་ ༦ པའི་ཚེས་ ༢༨ ཉིན་ཨ་རིའི་ནིའུ་ཡོག་ནང་རྟེན་གཞི་བྱས་པའི་ཞབས་པུས་ཀྱི་སྨན་ཁང་རྩེ་ཕུད་ Hospital for Special Surgery ནང་༸སྐུའི་ཞབས་པུས་གཡས་པ་སྨན་བཅོས་གནང་སྟེ་ལེགས་གྲུབ་བྱུང་ཡོད་པ་དང་།  ད་རེས་རྒྱལ་ས་ལྡི་ལིར་ཆིབས་བསྒྱུར་དེ་བཞིན་༸སྐུའི་ཞབས་པུས་གཡོན་མ་སྨན་བཅོས་སླད་ཡིན་ཞིང་།  […]

The post ༸སྐུའི་ཞབས་པུས་སྨན་བཅོས་ལེགས་གྲུབ་བྱུང་འདུག appeared first on vot.