ད་ལོའི་བོད་ཀྱི་གློག་བརྙན་དུས་ཆེན་དེ་ཕྱི་ཟླ་ ༩ ཚེས་ ༡༨ ནས་ཕྱི་ཟླ་ ༡༡ ཚེས་ ༡༥ བར་དུ་སུད་སིའི་ཛུ་རིག་དང་། དྷ་རམ་ས་ལ། ལོན་ཌོན དྷ་རམ་ས་ལ། ཝ་ཤིན་ཊོན། ནེའུ་ཡོག་བཅས་སུ་འཚོག་གི་ཡོད་ཅིང་། ལོན་ཊོན་དུ་བོད་ཀྱི་གློག་བརྙན་དུས་ཆེན་ཐེངས་དྲུག་པའི་སྐབས་བོད་ཀྱི་གློག་བརྙན་ཐུང་ངུ་ལྔ་ལ་གཡག་རྟགས་མའི་བྱ་དགའ་ཐོབ་ཡོད་འདུག

ཕྱི་ཟླ་ ༩ ཚེས་ ༢༥ ནས་ ༢༧ བར་ལོན་ཌོན་དུ་བོད་ཀྱི་གློག་བརྙན་དུས་ཆེན་ཐེངས་དྲུག་པ་འཚོགས་ཡོད་པ་དང་། ལོ་འདིའི་དུས་ཆེན་བོད་ཀྱི་དྲན་པ་ཞེས་པའི་བརྗོད་གཞིའི་སྟེང་གོ་བསྒྲིགས་བྱས་ཡོད་ལ། ལོན་ཌོན་གྱི་རྗེ་ནེ་སེ་སི་གློག་བརྙན་ཁང་(Genesis Cinema) དང་གར་ཌན་གློག་བརྙན་ཁང་(Garden Cinema)། དེ་བཞིན་རིའོ་གློག་བརྙན་ཁང་(Rio Cinema) བཅས་སུ་གློག་བརྙན་འགྲེམས་སྟོན་བྱས་ཡོད་འདུག འགྲེམས་སྟོན་བྱས་པའི་གློག་བརྙན་ཁག་གི་གྲས་སུ་ཉི་མ་མུ་རེ་(Nyima Murry) ལགས་ཀྱིས་འཁྲབ་ཁྲིད་བྱས་པའི་མཇལ་འཕྲད་(Encounters) ཅེས་པ་དང་། ཀུན་བཟང་སྐྱིད་གྲོང་(Kunsang Kyirong) ལགས་ཀྱིས་འཁྲབ་ཁྲིད་བྱས་པའི་གློག་བརྙན་ཐོག་མ་༡༠༠་སན་སེ་ཌི་(100 Sunset) ཞེས་པ་དང་། མོའི་བརྩམས་ཆོས་གསར་པ་བོད་ནས་འབྱོར་བའི་འཕྲིན་(Letters from Tibet) སོགས་ཡོད་ཅིང་། ཁ་ཐག་རིང་བའི་ཁྱིམ་(Far From Home) ཞེས་པའི་དངོས་བྱུང་གློག་བརྙན་གཟིགས་འབུལ་གྱི་ཆེད་དུ་ལྷ་སྒྲོན་བཀྲས་མཐོང་ལགས་ཕེབས་ནས། གློག་བརྙན་དེའི་ནང་བསྟན་པའི་ཁོ་མོའི་ནང་མིའི་ལོ་རྒྱུས་སྐོར་ལ་དྲི་བ་དྲིས་ལན་གནང་ཡོད་འདུག

མཇལ་འཕྲད་ཅེས་པའི་གློག་བརྙན་དེ་ནི་བོད་ཀྱི་ལོ་རྒྱུས་ཁྲོད་གཞིས་བྱེས་གཉིས་ཀྱི་ལོ་རྒྱུས་ཤུལ་བཞག་དང་། སྤྱི་ཚོགས་ཁ་འཐོར་གྱི་མྱོང་བ་རྗེས་འཚོལ། དབྱིན་ཇི་བཙན་རྒྱལ་རིང་ལུགས་པས་རྒྱལ་གར་ལ་དབང་བསྒྱུར་བྱས་པ་དང་། བོད་ལ་བཙན་འཛུལ་བྱས་པའི་ལོ་རྒྱུས་ཀྱི་འགལ་འདུའི་རང་བཞིན་དང་འབྲེལ་ཞིང་། འདི་ནི་དྲན་པ་དང་ངོ་བོ། བདག་དབང་། བཙན་རྒྱལ་རིང་ལུགས་ཀྱི་ཤུལ་བཞག་འཚོལ་ཞིབ་སྐོར་གྱི་བརྩམས་ཆོས་ཤིག་རེད་འདུག བོད་ནས་འབྱོར་བའི་འཕྲིན་པ་ཞེས་པ་ནི་དབྱིན་ཇིའི་དམག་དཔོན་ཨེ་རིག་པཱར་ཁིར་(Eric Parker) དང་དེང་དུས་ཀྱི་ཡིག་ཚགས་ཉམས་ཞིབ་པ་གཉིས་ཀྱིས་ཕན་ཚུན་སྤྲིངས་པའི་འཕྲིན་ཡིག་གི་སྐོར་རེད་འདུག

ཁ་ཐག་རིང་བའི་ཁྱིམ་ཞེས་པ་ནི་འཆམ་མཐུན་གྱི་ཁྱིམ་ཚང་ཞིག་གི་ལོ་རྒྱུས་ཀྱི་སྙིང་པོ་སྟེ། ཨ་ཕ་ཞིག་གི་དྲན་ཤེས་ཇེ་ཞན་དུ་སོང་བའི་བྱུང་རིམ་དང་། བོད་ལ་རང་དབང་ཐོབ་པའི་རེ་འདུན་གསལ་བའི་དངོས་བྱུང་གློག་བརྙན་ཞིག་རེད། གློག་བརྙན་དེའི་ནང་ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་རྒྱ་ནག་གི་བཙན་འོག་ནས་རྒྱ་གར་ལ་བྲོས་བྲོལ་དུ་ཕེབས་པའི་རྗེས་སུ་བོད་མི་སྟོང་ཕྲག་མང་པོ་བཙན་བྱོལ་དུ་འབྱོར་བ་དང་། ལོ་ངོ་དྲུག་ཅུ་ལྷག་གི་རྗེས་སུ། བཀྲས་མཐོང་ཚེ་དབང་ཆོས་རྒྱལ་དང་བཀྲས་མཐོང་ཇུ་ཌི་(Judy) གཉིས་ཀྱི་བརྩེ་དུང་གི་གཏམ་རྒྱུད་དང་། ཁོ་གཉིས་ཀྱིས་བོད་མི་སྐྱབས་བཅོལ་བར་རོགས་རམ་བྱས་པའི་ལས་དོན་ནས་འགོ་བཙུགས་ཏེ་བོད་ཀྱི་ཆབ་སྲིད་འཐབ་རྩོད་དང་། བོད་ཀྱི་ངོ་བོ་སྲུང་སྐྱོབ་ལ་དམིགས་པའི་མི་ཚེ། ཁོང་གི་དྲན་ཡུལ་གྱི་༧གོང་ས་མཆོག་དང་། དེ་སྔ་མཐོང་དཀོན་པའི་རྒྱ་གར་ལྷོ་ཕྱོགས་ནགས་གསེབ་ལ་གསར་དུ་བསྐྲུན་པའི་བོད་མིའི་གཞིས་ཆགས་ཀྱི་གཏམ་རྒྱུད། ཁྱིམ་ཚང་ཞིག་གི་གཏམ་རྒྱུད་དང་སྦྱར་ནས་བོད་རང་བཙན་གྱི་གནས་བབ་དྲན་མཁན་གྱི་མི་རབས་མཐའ་མ་ཞིག་གི་ལོ་རྒྱུས་སོགས་བཀོད་ཡོད་འདུག

བོད་ཀྱི་གློག་བརྙན་དུས་ཆེན་ཁྲོད་གློག་བརྙན་ཐུང་ངུའི་འགྲན་བསྡུར་གྱི་རིམ་པ་དེ་ནི་ཕྱི་ལོ་ ༢༠༡༠ བཟུང་མགོ་བཙུགས་པ་ཞིག་ཡིན་འདུག་ལ། དེ་ནས་བཟུང་གློག་བརྙན་ཐུང་ངུའི་འགྲན་བསྡུར་བྱེད་རྒྱུ་ནི་བོད་ཀྱི་གློག་བརྙན་དུས་ཆེན་ཁྲོད་མེད་དུ་མི་རུང་བའི་ཆ་ཤས་ཤིག་ཏུ་གྱུར་ཡོད། བོད་མི་དོན་གཉེར་ཅན་རྣམས་ལ་རང་ཉིད་ཀྱི་འཇོན་ཐང་ངོམ་སའི་གློག་བརྙན་འགྲེམས་སྤེལ་གྱི་སྟེགས་བུ་གལ་ཆེན་ཞིག་ཆགས་ཡོད། ལོ་རེ་བཞིན་གློག་བརྙན་འཁྲབ་ཁྲིད་པ་དང་སྒྱུ་རྩལ་བ་སོགས་གདན་འདྲེན་གྱིས་དཔྱད་འདེམས་བརྒྱུད། ཕུལ་བྱུང་གི་ཐོབ་འབྲས་ཅན་ལ་གཡག་རྟགས་མའི་བྱ་དགའ་སྤྲོད་ཀྱི་ཡོད་འདུག

ད་ལོའི་དཔྱད་འདེམས་པའི་ཁྲོད་རྩོམ་པ་པོ་དང་འཁྲབ་ཁྲིད་པ་གཅིག་ལྕོགས་གཡང་འཛོམས་བྷི་རོན་(Yangzom Brauen) ལགས་དང་། འབུམ་རམས་པ་དཔལ་ལྡན་རྒྱལ། སྒྱུ་རྩལ་བ་བསྟན་འཛིན་ཆོས་རྒྱལ། འཁྲབ་ཁྲིད་པ་བསྟན་འཛིན་ཟླ་གསལ། འཁྲབ་ཁྲིད་པ་དང་རྩོམ་པ་པོ་སྐལ་བཟང་ཚེ་བརྟན་བཅས་གདན་ཞུ་བྱས་ཡོད་ལ། འདི་ལོའི་གཡག་རྟགས་མ་ཐོབ་པའི་གློག་བརྙན་ཁག་ནི་དབྱིན་ཡུལ་གྱི་བཀྲ་ཤིས་ས་མོལ་(Tashi Samuels) དང་ཊུ་ཧེན་ཆ་ཊི་ར་(Tuhin Chadra) གཉིས་ཀྱི་བརྩམས་ཆོས་འཁོར་བ་( SAMSARA) དང་།  ཧྥ་རན་སིའི་མིག་དམར་ཇ་ནོད་(Migmar Jannot) ཀྱི་བརྩམས་ཆོས་བསྟན་ཛོ་(TENZO)། ཁ་ན་ཌའི་རིག་འབྱུང་དང་ཀུན་བཟང་གཉིས་ཀྱི་བརྩམས་ཆོས། བོད། ལྷགས་རླུང་གིས་གསོལ་བ་འདེབས་ས།(TIBET, WHERE THE WIND PRAYS) རྒྱ་གར་གྱི་སྐར་མ་ཡེ་ཤེས་རྣམ་དག་གི་བརྩམས་ཆོས་ཞགས་པ།(THE LOOP) རྒྱ་གར་གྱི་བསྟན་འཛིན་ལྷ་སྒྲོན་གྱི་བརྩམས་ཆོས། སྦས་ལུང་(BALUNG) བཅས་ལ་ཐོབ་ཡོད་འདུག

བོད་ཀྱི་གློག་བརྙན་དུས་ཆེན་ནི་ཕྱི་ལོ་ ༢༠༠༩ ལོར་བོད་ཀྱི་གློག་བརྙན་འཁྲབ་ཁྲིད་པ་དོན་གྲུབ་དབང་ཆེན་ལ་ཆེད་དམིགས་ཀྱིས་བཙུགས་པ་ཞིག་རེད་ལ། ཁོང་གིས་ཕྱི་ལོ་ ༢༠༠༨ ལོའི་པེ་ཅིན་ཨོ་ལིམ་ཕིག་གི་སྔོན་དུ་རང་སྲོག་ལ་མ་འཛེམས་པར། བོད་ནང་གི་བོད་མི་རྣམས་ལ་བཅར་འདྲི་བྱས་པའི་གློག་བརྙན་འཇིགས་བྲལ་(Leaving Fear Behind) ཞེས་པ་བཟོས་རྗེས། རྒྱ་ནག་གིས་ཁོང་འཛིན་བཟུང་བྱས་ཏེ་ལོ་དྲུག་གི་བཙོན་འཇུག་ཁྲིམས་ཐག་བཅད། ཕྱི་ལོ་ ༢༠༡༧ ལོར་ཁོང་བོད་ནས་བྲོས་བྱོལ་གྱིས་ཨ་རིར་ཡོད་པའི་ནང་མི་དང་མཉམ་འཛོམས་བྱུང་། གློག་བརྙན་དུས་ཆེན་འདི་ནི་དང་བླངས་ཀྱི་ལས་བྱེད་པ། བཟོ་སྐྲུན་པ། ཡིག་སྒྱུར་པ། རྩོམ་སྒྲིག་པ་སོགས་ལས་གྲུབ་པའི་དང་བླངས་ཚོགས་པ་ཞིག་རེད་འདུག དེར་བོད་མིས་བཟོས་པའི་གློག་བརྙན་རྣམས་འགྲེམས་སྟོན་བྱེད་ཀྱི་ཡོད། ལོན་ཌོན་བོད་ཀྱི་གློག་བརྙན་དུས་ཆེན་ནི་ཕྱི་ལོ་ ༢༠༡༩ ལོར་མགོ་བཙུགས་པ་ཞིག་རེད་འདུག

གསར་འགོད་པ། རྟ་མགྲིན་མཚོ། རྩོམ་སྒྲིག་བྱེད་མཁན། ཆོས་རྒྱལ་སྐྱབས།

The post ལོན་ཌོན་དུ་བོད་ཀྱི་གློག་བརྙན་དུས་ཆེན་ཐེངས་དྲུག་པ་འཚོགས། appeared first on བོད་ཀྱི་དུས་བབ།.