༄༅། །མཚུངས་མེད་བོད་ཀྱི་དུས་བབ་གསར་ཤོག་གི་མགོ་ལས་རྣམ་པའི་སྙན་ལམ་དུ།

སྙན་སེང་འཚམས་འདྲི།

སྤྱིར་བཏང་བོད་ཀྱི་དུས་བབ་གསར་ཤོག་དབུ་བརྙེས་ནས་མི་ལོ་ ༣༠ འཁོར་བའི་དུས་ཆེན་ཁྱད་པར་ཅན་འདིར། མགོ་ལས་རྣམ་པ་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ་བ་དང་འབྲེལ་ནས། རང་ཉིད་ཡུན་རིང་གི་ཀློག་པ་པོ་ཞིག་ཡིན་པའི་ཆ་ནས་མི་ལོ་སུམ་ཅུའི་རིང་གི་དུས་བབ་བཀླགས་པའི་མྱོང་ཚོར་དང་འབྲེལ་བའི་བསམ་ཚུལ་འགའ་ཞུ་འདོད་ཡོད།

ལོ་རྒྱུས་ཀྱི་འཕེལ་རིམ་ཁྲོད་དཀའ་ཚེགས་ག་ཚོད་འཕྲད་ཡོད་ན་ཡང་། དེ་དག་ལྷུར་བླངས་ཏེ་བོད་ཀྱི་བདེན་པའི་འཐབ་རྩོད་དང་གསར་འགྱུར་གྱི་ལས་དོན་ལ་འགྱུར་མེད་དུ་བརྩོན་པར་རྗེས་སུ་ཡི་རངས་ཞུ་རྒྱུ་ཡིན།

ད་དུང་ཡིན་ནའང་མུ་མཐུད་དུ་དཀའ་ཚེགས་ལ་གདོང་ལེན་གནང་སྟེ། རྟག་ཏུ་ཉམས་པ་མེད་པར་མདུན་ནས་མདུན་དུ་བསྐྱོད་ཐུབ་པའི་སྨོན་འདུན་དང་བཅས།

ཆབ་མདོ་ངག་ཕུན་གྱིས་ ༢༠༢༦ ཟླ་ ༩ ཚེས་ ༡༡ ཉིན་ཕུལ།

དེ་ཡང་མི་ཡུལ་འདིར་བོད་ཀྱི་དུས་བབ་གསར་ཤོག་སྐུ་བལྟམས་ནས་མི་ལོ་སུམ་ཅུ་ཕྱིན་པ་དང་། མི་ལོ་དེ་དག་གི་རིང་དཀའ་ཚེགས་དུ་མ་ཞིག་ལ་གདོང་ལེན་བྱེད་དགོས་བྱུང་ཡོད་པ་ནི་སྨྲ་མ་དགོས་པ་ཞིག་རེད། ཡིན་ནའང་དཀའ་ཚེགས་དེ་དག་ལས་བརྒལ་ཏེ་མདུན་བསྐྱོད་བྱེད་ཐུབ་ཡོད། ང་རང་ཀློག་པ་པོ་ཞིག་ལ་མཚོན་ན་བོད་ཀྱི་དུས་བབ་ཀྱི་ཕན་ཐོགས་ཆེན་པོ་བྱུང་ཡོད། ང་རང་འཕགས་ཡུལ་དུ་སླེབས་དུས་བཙན་བྱོལ་སྤྱི་ཚོགས་ནང་གསར་ཤོག་སྐད་གྲགས་ཆེ་ཤོས་ནི་དམངས་གཙོ་གསར་ཤོག་རེད། མི་ཚོས་དམངས་གཙོ་གསར་ཤོག་ནང་དེ་རིང་ཅི་ཞིག་བཀོད་འདུག་ཅེས་ཚ་ཚ་འུར་འུར་གྱིས་ལྟ་ཀློག་བྱེད་ཀྱི་ཡོད། རིམ་གྱིས་རྒྱུ་རྐྱེན་སྣ་མང་ལ་བརྟེན་ནས་དམངས་གཙོ་གསར་ཤོག་སྒོ་རྒྱག་དགོས་བྱུང་སྟེ། དེ་ནས་བཟུང་བོད་ཀྱི་དུས་བབ་མི་ཡུལ་དུ་གསར་བསྐྲུན་གནང་བ་རེད། བཙན་བྱོལ་ནང་གསར་ཤོག་གཉིས་ཡོད་པ་ནི་བོད་ཀྱི་དུས་བབ་དང་། བོད་ཀྱི་བང་ཆེན་གཉིས་རེད། དེ་གཉིས་ཀྱིས་བོད་ཀྱི་སྐད་ཡིག་ལ་ཞབས་འདེགས་རླབས་ཆེན་ཞུ་བཞིན་ཡོད།

ལྷག་དོན་༸གོང་ས་༸སྐྱབས་མགོན་ཆེན་པོ་མཆོག་གི་གསུང་འཕྲིན་ལས། “གསར་ཤོག་གི་དགོས་དོན་དམིགས་ཡུལ་གཙོ་བོ་ནི་འཛམ་གླིང་གི་གནས་ཚུལ་འཕོ་འགྱུར་སྤྱི་དང་། བྱེ་བྲག་ཏུ་བོད་དོན། བོད་པའི་སྤྱི་ཚོགས་ཀྱི་དངོས་ཡོད་དྲང་བདེན་གྱི་གནས་ཚུལ་ཁུངས་ལྡན་རྣམས་སྨྲ་བརྗོད་རང་དབང་གི་ལམ་ནས་དགེ་འདོན་སྐྱོན་སེལ་གྱི་བསམ་འཆར་དང་བཅས་འཕྲལ་མྱུར་སྤེལ་ཏེ་རྒྱ་ཆེའི་ཀློག་པ་པོ་རྣམས་ཀྱི་རྣམ་དཔྱོད་བློ་གྲོས་གོང་མཐོར་སྤེལ་ཐབས་བྱ་རྒྱུ་དེ་ཡིན།” ཞེས་དང་། ཡང་ཀློག་པ་པོ་ཡོངས་ཀྱི་ཡིད་ཆེས་དགའ་མོས་བྱེད་པའི་ཚད་ལྡན་གྱི་གསར་ཤོག་ཅིག་ཡོང་ཐབས་སུ་འབད་བརྩོན་དང་འབྲེལ་དམིགས་དོན་མཇུག་སྐྱོང་མཐའ་འཁྱོལ་དགོས་གལ་ཞེས་བཀའ་སློབ་ལམ་སྟོན་གནང་ཡོད།

དེ་བཞིན་དཔལ་ལྡན་བཀའ་ཤག་གིས། “མང་གཙོའི་སྲིད་གཞུང་གི་སྤྱི་ཚོགས་འཕེལ་རིམ་དང་རང་དབང་འཐབ་རྩོད་ཀྱི་དུས་སྐབས་སུ་གསར་འཕྲིན་གྱི་ལས་དོན་ནི་ཤིན་ཏུ་མཁོ་གནད་ཆེ་བ་ཞིག་དང་། དེ་ཡང་རྩོམ་སྒྲིག་པའི་འདོད་ཕྱོགས་སུ་མ་ལྷུང་བར་ཕྱོགས་ཡོངས་མཐོང་ཐུབ་པ་ཞིག་དགོས།” ཞེས་དང་། བོད་མི་མང་སྤྱི་འཐུས་ལྷན་ཚོགས་ཀྱིས། “མང་གཙོའི་འཕེལ་རིམ་དང་། རང་དབང་ཅན་གྱི་གསར་ཤོག་ནི་སྤྱི་ཚོགས་དང་སྲིད་གཞུང་གཉིས་ཀའི་ལེགས་ཉེས་བལྟ་བའི་མེ་ལོང་ལྟ་བུ་དང་། མང་ཚོགས་ཀྱི་ལྟ་གྲུབ་སྤེལ་བའི་བརྒྱུད་ལམ། ཉམས་ཆུང་ཡུལ་མིའི་མགྲིན་ཚབ། གཞུང་མང་གཉིས་ཀའི་སྐྱོན་མཚང་སྟོན་པའི་མཛུབ་མོའི་ཚུལ་དུ་གལ་གནད་ཆེ་བའི་སྨྲ་བརྗོད་ཀྱི་རང་དབང་གི་ཆ་ཤས་ཤིག་ཡིན།” ཞེས་གསལ་བ་ལྟར། གསར་ཤོག་ནི་འཛམ་གླིང་གི་ཆབ་སྲིད་འཕོ་འགྱུར་དང་། མི་མང་གི་མགྲིན་ཚབ་པ། གཞུང་མང་གཉིས་ཀའི་ལེགས་ཉེས་སྟོན་མཁན་སོགས་ཡིན་པ་གོང་གསལ་གསུང་འཕྲིན་ཁག་ལས་རྟོགས་ཐུབ།

བོད་ཀྱི་དུས་བབ་ཀྱིས་བོད་ཀྱི་སྐད་ཡིག་ལ་དོ་སྣང་ཡོང་བར་ཕན་ཐོགས་ཧ་ཅང་ཆེན་པོ་བྱུང་ཡོད་ཅིང་། ཐོག་མར་ཕྱི་རྒྱལ་ཡུལ་གྲུ་ཁག་ཏུ་ཡོང་སྒོ་གང་ཡང་མེད་པའི་དཀའ་ངལ་འོག་ནས་རྒྱུན་མ་ཆད་པར་གསར་ཤོག་འདོན་སྤེལ་གནང་སྟེ། བཙན་བྱོལ་སྤྱི་ཚོགས་ནང་གི་ཆོས་དང་རིག་གཞུང་། གནས་ཚུལ་སྤེལ་བའི་དགོས་མཁོ་སྐོང་ཐུབ་པ་བྱུང་བ་ནི་དགའ་འོས་པ་ཞིག་རེད་སྙམ། དེ་བཞིན་ཟླ་ཕྱེད་ཚགས་པར་ནས་བཟུང་ཉིན་བཅུ་རེའི་ཚགས་པར་དུ་བསྒྱུར་ཏེ་དུས་དང་འཚམ་པར་ཡར་རྒྱས་ཀྱི་ཁ་ཕྱོགས་ཟམ་མ་ཆད་པར་གནས་ཐུབ་པ་བྱུང་ཡོད།

ད་དུང་ཡིན་ནའང་ཡར་རྒྱས་ལ་མཐའ་མེད་དུས་དཀའ་ཚེགས་ཁག་ལ་གདོང་ལེན་གནང་ནས་མདུན་བསྐྱོད་བྱ་རྒྱུ་དེ་ནི་གལ་ཆེའི་གནད་དོན་ཞིག་ཡིན་པ་དང་། གནས་ཚུལ་གང་ཞིག་བཀོད་པ་ཡིན་ཡང་དྲང་བདེན་དང་ཕྱོགས་རིས་མེད་པར་བཀོད་རྒྱུ་དེ་ཡང་ཤིན་ཏུ་གལ་ཆེན་རེད། ལྷག་པར་དུ་མི་མང་གི་ཡིད་ཆེས་འཕེལ་བའི་གསར་འགྱུར་བཀོད་དགོས་པ་ལས་ཕྱོགས་ལྷུང་གཏན་ནས་བྱེད་མི་རུང་། གལ་སྲིད་གསར་ཤོག་གང་ཞིག་ལ་ཕྱོགས་ལྷུང་གི་དྲི་མ་འགོས་ཚར་ན་རིམ་བཞིན་མི་མང་གི་ཡིད་ཆེས་བརླག་འགྲོ་བ་དང་། མི་མང་གི་ཡིད་ཆེས་བརླག་སོང་ན་གསར་ཤོག་གི་དགོས་དམིགས་ཇི་བཞིན་ལམ་དུ་མ་ཕྱིན་པ་རེད། (འདིར་བཤད་དགོས་པ་ཞིག་ལ་གོང་གི་གནད་དོན་འདི་དག་ནི་སྤྱིར་བཏང་གསར་ཤོག་གི་འགྲོ་སྟངས་བརྗོད་པ་ལས་བོད་ཀྱི་དུས་བབ་ལ་སྐྱོན་བརྗོད་བྱེད་ཀྱིན་མེད།)

ལྷག་པར་དུ་དེང་སྐབས་འཕྲུལ་རིག་དུས་རབས་ཡིན་དུས་དྲ་ཚིགས་ཁག་ནས་ལྟ་ཀློག་ཐུབ་ཀྱི་ཡོད་མོད། གསར་ཤོག་དངོས་སུ་ལག་ཏུ་བཟུང་ནས་ལྟ་ཀློག་བྱ་རྒྱུ་བྱུང་ན་དམིགས་བསལ་གྱི་སྤྲོ་སྣང་ཞིག་ཡོང་གི་འདུག་ཅིང་། དེང་སྐབས་བོད་ཀྱི་སྐད་ཡིག་ཉམས་ཆག་འགྲོ་བཞིན་ཡོད་ཚུལ་བཤད་མཁན་མང་པོ་ཡོད་མོད། ཡང་སྙིང་གསར་ཤོག་མངགས་ཉོ་གནང་ནས་ཀློག་མཁན་ག་ཚོད་ཡོད་དམ། ཚོགས་པ་ཁག་གིས་ཀྱང་གསར་ཤོག་མངགས་ཉོ་བྱས་ནས་ལྟ་ཀློག་བྱེད་ཀྱི་ཡོད་མེད་མི་ཤེས།

ང་ཚོའི་སྐད་ཡིག་ང་ཚོས་བདག་པོ་རྒྱག་དགོས་པ་ནི་ཟློག་མེད་ཀྱི་འགན་འཁུར་ཞིག་རེད། བདག་པོ་རྒྱག་ཅེས་པ་ནི་མཆོད་བཤམ་ནང་སྒྲིག་བཞག་པ་ཞིག་ལ་མི་བྱ་བར། ལག་ལེན་དུ་བེད་སྤྱོད་གཏོང་དགོས་པ་ཞིག་ཡིན། དེང་སྐབས་ན་གཞོན་ཚོས་དབྱིན་ཡིག་བེད་སྤྱོད་མང་དུ་བྱེད་པ་ལས་བོད་ཡིག་བཀོལ་སྤྱོད་བྱེད་ཀྱི་མེད། ངེས་པར་དུ་བོད་པ་ནང་ཁུལ་དུ་བོད་ཡིག་བཀོལ་སྤྱོད་བྱེད་དགོས་པ་གལ་ཆེན་པོ་རེད། དེ་བཞིན་ལོ་ན་ཆུང་བ་ཚོས་བོད་ཡིག་བཀོལ་སྤྱོད་གནང་དུས་ཡིག་ནོར་འགའ་ཤས་མཐོང་སྐབས་ལམ་སེང་དམའ་འབེབས་བྱས་ནས་ལོ་ཆུང་རྣམས་ཀྱི་སེམས་ཤུགས་ཉམས་སུ་འཇུག་གི་འདུག དེ་འདྲ་གཏན་ནས་བྱེད་རྒྱུ་མི་འདུག་སྙམ།

རང་རེའི་སྤྱི་སྒེར་ཚང་མས་བོད་ཡིག་ཡར་རྒྱས་འགྲོ་དགོས་ན། དང་ཐོག་གསར་ཤོག་ཁག་བཀླག་པ་ཡིན་ན། གསར་ཤོག་ནང་དུ་ལྟ་བའི་རྣམ་གཞག་སྐོར་གྱི་མཁྲེགས་པོའི་སྐོར་དེ་འདྲ་མེད་ལ། དུས་རྒྱུན་སྤྱི་ཚོགས་དང་འབྲེལ་བ་ཡོད་པའི་ཐ་སྙད་རྐྱང་རྐྱང་ཡིན་པས། རིམ་བཞིན་བོད་ཡིག་གི་ཤེས་ཚད་ཡར་རྒྱས་འགྲོ་རྒྱུ་ཡིན་པ་ནི་སྨྲ་མ་དགོས་པ་ཞིག་རེད།

བོད་ཀྱི་དུས་བབ་གསར་ཤོག་ནི་བཙན་བྱོལ་བོད་མིའི་སྤྱི་ཚོགས་ནང་དུས་ཡུན་རིང་ཤོས་དང་། འགྱུར་བ་མང་པོ་བརྒྱུད་ནས་ད་བར་བརྟན་པོར་གནས་ཐུབ་པའི་གསར་ཤོག་ཚད་ལྡན་ཞིག་ཡིན། གསར་ཤོག་འདིས་བོད་མིའི་སྤྱི་ཚོགས་ནང་ཆབ་སྲིད་དང་། སྤྱི་ཚོགས། རིག་གཞུང་། ཤེས་ཡོན་སོགས་ཀྱི་གནས་ཚུལ་ཁག་དུས་ཐོག་ཏུ་སྤེལ་ནས་མི་མང་གི་མིག་རྒྱ་དང་བློ་རྒྱ་བསྐྱེད་པར་ནུས་པ་བླ་མེད་ཐོན་ཡོད།

མང་གཙོའི་མེ་ལོང་། གསར་ཤོག་ནི་གཞུང་དང་མང་ཚོགས་གཉིས་ཀྱི་བར་དུ་འབྲེལ་མཐུད་བྱེད་མཁན་དང་། ལེགས་ཉེས་སྟོན་པའི་མེ་ལོང་ལྟ་བུ་ཡིན་པས་སྤྱི་ཚོགས་བདེ་རྩར་སྨན་པའི་ནུས་པ་ཐོན་གྱི་ཡོད།

དྲང་བདེན་གྱི་སྒྲ་དབྱངས། ཕྱོགས་ལྷུང་མེད་པར་དོན་དངོས་ཀྱི་གནས་ཚུལ་འདོན་སྤེལ་བྱེད་པ་ནི་གསར་ཤོག་ཅིག་གི་ཚེ་སྲོག་ཡིན་ལ། ཀློག་པ་པོའི་ཡིད་ཆེས་འགུག་པའི་ལྡེ་མིག་ཀྱང་ཡིན།

དེང་དུས་འཕྲུལ་རིག་དང་དྲ་རྒྱའི་དུས་རབས་འདིར་གསར་འགྱུར་ལྟ་ཀློག་གི་རྣམ་པ་བརྗེ་ཡི་ཡོད་ནའང་། དངོས་སུ་གསར་ཤོག་ལག་ཏུ་བཟུང་ནས་ཀློག་པའི་སྤྲོ་སྣང་དང་ཕན་ཡོན་བླ་ན་མེད་པ་ཞིག་རེད། ལྷག་པར་དུ་ན་གཞོན་རྣམས་ཀྱིས་དབྱིན་ཡིག་གཙོ་བོར་བཟུང་ནས་བོད་ཡིག་བཀོལ་སྤྱོད་མ་བྱས་ཚེ། རང་རེའི་ཐུན་མོང་མ་ཡིན་པའི་སྐད་ཡིག་ཉམས་ཉེན་དུ་འགྲོ་སྲིད། དེར་བརྟེན་ཡིག་ནོར་ཕྲན་བུ་ཤོར་བ་ལ་སྐྱོན་བརྗོད་མི་བྱེད་པར་སྐུལ་མ་དང་རྒྱབ་སྐྱོར་བྱས་ཏེ། གསར་ཤོག་ཀློག་འདོན་སོགས་ཀྱི་ལམ་ནས་བོད་ཡིག་གི་ཐ་སྙད་རྒྱ་ཆེར་གཏོང་རྒྱུ་ནི་འགན་འཁུར་གཙོ་བོ་ཡིན་ནོ།།

མཐའ་དོན་བོད་ཀྱི་དུས་བབ་གསར་ཤོག་དབུ་བརྙེས་ནས་མི་ལོ་ ༣༠ འཁོར་བའི་དུས་ཆེན་ཁྱད་པར་ཅན་འདིར་མགོ་ལས་རྣམ་པ་ཡོངས་ལ་འཚམས་འདྲི་བཀྲ་ཤིས་བདེ་ལེགས་ཞུ་བ་དང་འབྲེལ་ནས། གོང་ཞུས་ལྟར་རང་ཉིད་ཡུན་རིང་གི་ཀློག་པ་པོ་ཞིག་ཡིན་པའི་ཆ་ནས་མི་ལོ་སུམ་ཅུའི་རིང་གི་དུས་བབ་ཀློག་པའི་མྱོང་ཚོར་དང་འབྲེལ་བའི་བསམ་ཚུལ་འགའ་ཞུས་ཡོད།

ལོ་རྒྱུས་ཀྱི་འཕེལ་རིམ་ཁྲོད་དཀའ་ཚགས་ག་ཚོད་འཕྲད་ཡོད་ན་ཡང་། དེ་དག་ལྷུར་ལེན་བྱས་ཏེ་བོད་ཀྱི་བདེན་པའི་འཐབ་རྩོད་དང་གསར་འགྱུར་གྱི་ལས་དོན་ལ་འགྱུར་མེད་དུ་བརྩོན་པར་རྗེས་སུ་ཡི་རངས་ཞུ་རྒྱུ་ཡིན།

ད་དུང་ཡིན་ནའང་མུ་མཐུད་དུ་དཀའ་ཚེགས་ལ་གདོང་ལེན་གནང་སྟེ། ནམ་ཡང་ཉམས་པ་མེད་པར་མདུན་ནས་མདུན་དུ་བསྐྱོད་ཐུབ་པའི་སྨོན་འདུན་དང་བཅས།།

The post མི་ཡུལ་འདིར་བོད་ཀྱི་དུས་བབ་གསར་ཤོག་དབུ་བརྙེས་ནས་མི་ལོ་སུམ་ཅུ་འཁོར་བ་ལས་འཕྲོས་པའི་གཏམ། appeared first on བོད་ཀྱི་དུས་བབ།.