དེ་རིང་ཕྱི་ཟླ་ ༡༠ ཚེས་ ༢ ཉིན། རྒྱ་གར་གྱི་མེས་པོ་དམ་པ་གྷན་དྷི་མཆོག་འཁྲུངས་ནས་མི་ལོ་ ༡༥༧ འཁོར་བའི་དུས་ཆེན་དང་བསྟུན། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པས་དབུས་པའི་སྲི་ཞུའི་ལས་བྱེད་ཡོངས་ནས་ཁོང་ལ་རྗེས་དྲན་གུས་འདུད་ཞུས་གནང་བ་དང་སྦྲགས། མཛད་སྒོའི་ཐོག་སྲིད་སྐྱོང་སྤེན་པ་ཚེ་རིང་མཆོག་ནས། བོད་ཀྱི་འཐབ་རྩོད་འདི་མུ་མཐུད་འཚེ་མེད་ཞི་བ་དང་གྲོས་མོལ་གྱི་ལམ་དུ་སྐྱོད་རྒྱུའི་ཆོད་སེམས་བསྐྱར་ནན་དང་སྦྲགས། གྷན་དྷི་མཆོག་གི་ལྟ་གྲུབ་ཀྱིས་༧གོང་ས་མཆོག་གཙོས་པའི་རྒྱལ་སྤྱིའི་དབུ་ཁྲིད་མང་པོར་ཤུགས་རྐྱེན་ཆེན་པོ་ཐེབས་ཡོད་པ་དང་། ལྷག་པར་དུ་༧གོང་ས་མཆོག་གིས་སྐུ་ཚེ་ཧྲིལ་པོར་འཚེ་མེད་ཞི་བའི་ལམ་སྲོལ་བཟུང་བ་དེས་གྷན་དྷི་མཆོག་གི་རིན་ཐང་མཚོན་གྱི་ཡོད་པ་གསུངས་གནང་སོང་། དེ་བཞིན་འདི་ཉིན་རྒྱ་གར་གྱི་སྲིད་བློན་མོ་དྷི་མཆོག་གིས་ཀྱང་ རཱ་ཇེ་གྷ་ཊ་ (Rajghat) རུ་གྷན་དྷི་མཆོག་ལ་གུས་འདུད་ཞུས་པ་དང་འབྲེལ། ཁོང་གི་བདེན་པ་དང་འཚེ་མེད་ཞི་བའི་རིན་ཐང་རྣམས་དེང་གི་རྒྱ་གར་ལའང་གལ་ཆེན་པོ་ཡིན་པ་གསུངས་ཤིང་། མང་ཚོགས་ནས་རང་ཡུལ་གྱི་ཐོན་རྫས་ (Khadi དང་ Swadeshi) བེད་སྤྱོད་ཀྱིས་རང་ཁ་རང་གསོ་ཐུབ་པའི་རྒྱ་གར་ཞིག་བསྐྲུན་རྒྱུར་འབོད་སྐུལ་ཞུས་གནང་འདུག །