ཉེ་ལམ་ཟླ་བ་འདིའི་ཕྱི་ཚེས་ ༢༥ ཉིན་ Dame Sarah Mullally མཆོག་ Archbishop of Canterbury འམ་ཡི་ཤུའི་ཆོས་དཔོན་ཆེན་མོ་ ༡༠༦ པར་ཁྲི་འདོན་མཛད་པ་དང་།  ཁོང་ནི་ལོ་ངོ་ ༡༤༠༠ ལྷག་གི་ལོ་རྒྱུས་ནང་ Canterbury ཆོས་དཔོན་གྱི་མཛད་འཁུར་བཞེས་མཁན་བུད་མེད་ཐོག་མ་དེ་ཡིན་པ་ལྟར། དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་དཔོན་མཆོག་ལ་དམིགས་བསལ་འཚམས་འདྲི་མཛད་པ་དང་འབྲེལ། ཁོང་ཆོས་དཔོན་གྱི་གོ་གནས་དེའི་ཐོག་བསྐོ་བཞག་བྱུང་བ་དེ་ནི་རེ་བའི་འོད་སྣང་ཞིག་ཡིན་པ་བཀའ་སྩལ་འདུག Dame Sarah Mullally མཆོག་ནི་ཕྱི་ལོ་ ༢༠༡༨ ནས་བཟུང་ལོན་ཌོན་གྱི་ཆོས་དཔོན་དང་། དེའི་སྔོན་ལ་ལོ་མང་རིང་སྨན་ཞབས་པའི་ཕྱག་ལས་གནང་མྱོང་ཡོད་པ་རེད། ༸གོང་ས་མཆོག་གིས་དེ་རིང་ཆོས་དཔོན་དེ་ཉིད་ལ་མཛད་པའི་འཚམས་འདྲའི་གསུང་འཕྲིན་ནང་། དེང་སྐབས་འཛམ་གླིང་ནང་དཀའ་ངལ་མང་དག་ཅིག་འཕྲད་བཞིན་ཡོད་པ་དེ་དག་ནི་གཞི་རྩའི་འགྲོ་བ་མིའི་རིན་ཐང་ལ་ཚོད་བགམ་བྱེད་པའི་དུས་སྐབས་ཤིག་ཡིན་པར་བཀའ་སྩལ་བ་དང་འབྲེལ།  རིན་ཐང་འདི་དག་བསྐྱར་གསོ་དང་དེ་དག་ཐོག་རྒྱ་ཆེ་ས་ནས་དོ་སྣང་ཡོང་བར་བྱ་རྒྱུ་ནི་མགོན་པོ་༸གང་ཉིད་མཆོག་ཆོས་ལུགས་དབུ་ཁྲིད་ཅིག་ཡིན་པའི་ཆ་ནས་འགན་འཁྲི་དམིགས་བསལ་ཞིག་ལ་ངོས་འཛིན་མཛད་ཀྱི་ཡོད་ཅེས་བཀའ་སྩལ་བ་མ་ཟད།  འཛམ་གླིང་གི་ཆོས་ལུགས་ཆེ་ཁག་ཚང་མས་སྙིང་རྗེ་དང་། བཟོད་སྒོམ། ཚུལ་ཁྲིམས། ཆོག་ཤེས་བཅས་ཀྱི་བསླབ་བྱ་དང་། དེ་དག་སྐྱེད་སྲིང་བྱེད་སྟངས་ཀྱི་ལམ་སྟོན་ངོ་མ་གནང་གི་ཡོད་པ་ལྟར། རིན་ཐང་འདི་དག་ནི་ང་ཚོས་འགྲོ་བ་མི་ཡོངས་དང་ལྷན་དུ་དོན་སྙིང་ལྡན་པའི་ཐོག་བརྒྱུད་སྐུལ་དང་ཕན་ཚུན་ཉམས་སུ་མྱོང་ཐུབ་རྒྱུ་ཞིག་ཡིན་པ་བཀའ་སྩལ་འདུག མ་ཟད་༸གོང་ས་མཆོག་གིས་ཡི་ཤུའི་ཆོས་དཔོན་ཆེན་མོ་ Dame Sarah Mullally མཆོག་གོ་གནས་དེ་བཞེས་མཁན་བུད་མེད་ཐོག་མ་དེ་ཆགས་ཀྱི་ཡོད་པར་ཐུགས་དགྱེས་ཚོར་ཧ་ཅང་ཆེན་པོ་བྱུང་བ་བཀའ་སྩལ་དང་འབྲེལ། བུད་མེད་རྣམས་ནི་སྙིང་རྗེ་དང་འབྲེལ་བའི་ཐོག་ནས་གཞན་གྱི་བདེ་དོན་ལ་སེམས་འཁུར་བྱེད་པའི་ནུས་པ་ཆེ་བ་ཡོད་པ་ནི་ཚན་རིག་གི་བདེན་དཔང་མང་པོའི་ཐོག་ནས་སྒྲུབ་ཀྱི་ཡོད་སྟབས། ༸གོང་ས་མཆོག་སྐུ་སྒེར་གྱི་དགོངས་ཚུལ་ལ་འཛམ་གླིང་འགོ་ཁྲིད་ཀྱི་གོ་གནས་ཐོག་བུད་མེད་མང་བ་ཡོད་པ་ཞིག་འབྱུང་ན། ཕན་ཚུན་བསམ་ཤེས་དང་ཞི་བདེ་སྔར་ལྷག་ཡོང་རྒྱུའི་ཡིད་ཆེས་མཛད་ཀྱི་ཡོད་སྐོར་གསུངས་བ་དང་འབྲེལ། ཁོང་གོ་གནས་དེའི་ཐོག་བསྐོ་བཞག་བྱུང་བ་དེ་ནི་རེ་བའི་འོད་སྣང་ཞིག་ཡིན་པ་བཀའ་སྩལ་འདུག

The post ༸གོང་ས་མཆོག་གིས་ Dame Sarah Mullally མཆོག་ཡི་ཤུའི་ཆོས་དཔོན་ཆེན་མོ་ ༡༠༦ པར་ཁྲི་འདོན་མཛད་པར་འཚམས་འདྲི། appeared first on vot.